🚗 ભાડે લેવાના બહાને છેતરપિંડી: બારડોલીનો શખ્સ છ કાર સાથે ઝડપાયો
બારડોલી: કાર ભાડે લેવાના બહાને ગાડીઓ લઈ જઈ પરત ન આપવા અને અન્યને ગીરવે મૂકી દેવાના કૌભાંડમાં બારડોલીનો એક શખ્સ ઝડપાયો છે. કામરેજ તાલુકાના વાવ ગામેથી થયેલી ફરિયાદના આધારે એલસીબીની ટીમે કાર્યવાહી કરીને આરોપીની ધરપકડ કરી છે અને તેની પાસેથી કુલ છ કાર કબજે કરી છે.
કેવી રીતે થઈ છેતરપિંડી ???
આ ઘટનાનો પર્દાફાશ ત્યારે થયો જ્યારે વાવના અક્ષય મહેશભાઈ ભાલીયાએ કામરેજ પોલીસમાં ફરિયાદ નોંધાવી. અક્ષય ભાલીયા સુરત ખાતે ડ્રાઈવર તરીકે નોકરી કરે છે અને તેમની માલિકીની સ્વીફ્ટ ડિઝાયર (નં. GJ-05-RT-1837) કાર હતી. અક્ષયના મિત્ર શશીકાંત પરમારે તેમને બારડોલીના આકૃતિ વિલામાં રહેતા અંકિત પરેશકુમાર શાહ (ઉર્ફે અંકિત શાહ) અને તેના સાગરીત હિતેશનો પરિચય કરાવ્યો. અંકિત શાહે અક્ષયની સ્વીફ્ટ ગાડી રૂ. 1,700 પ્રતિ દિવસના ભાડા પર લઈ જઈને ભાડાના પૈસા કે ગાડી પરત ન આપી. બાદમાં અક્ષયને જાણ થઈ કે તેની ગાડી બીજા કોઈને ગીરવે મૂકી દેવામાં આવી છે, જેથી તેણે કામરેજ પોલીસમાં વિશ્વાસઘાત અને છેતરપિંડીની ફરિયાદ નોંધાવી.
એલસીબીની કાર્યવાહી અને વધુ ગુનાનો પર્દાફાશ
ફરિયાદના આધારે એલસીબીની ટીમે તપાસ હાથ ધરીને બારડોલીથી અંકિત શાહને ઝડપી પાડ્યો. તેની પૂછપરછ કરતા અન્ય એક છેતરપિંડીનો કિસ્સો પણ સામે આવ્યો. વાવ ગામના રાહુલ ઠાકોર નામના યુવાનની ઈનોવા ગાડી પણ અંકિત શાહ ભાડે ફેરવવાના બહાને લઈ ગયો હતો અને આજદિન સુધી તેનું ભાડું કે ગાડી પરત કરી નહોતી. આ મામલે પણ કામરેજ પોલીસમાં વધુ એક ગુનો નોંધવામાં આવ્યો છે.
એલસીબીની ટીમે અંકિત શાહની વધુ ઊંડાણપૂર્વક પૂછપરછ કરતાં તેની પાસેથી અન્ય પાંચ ગાડીઓ પણ મળી આવી, જે તેણે કદાચ આવી જ રીતે છેતરપિંડી કરીને મેળવી હતી. પોલીસે આ તમામ છ ગાડીઓ કબજે કરી છે અને આ મામલે વધુ તપાસ હાથ ધરી છે. આ ઘટના દર્શાવે છે કે કાર ભાડે આપતી વખતે સાવચેતી રાખવી કેટલી જરૂરી છે.
ગુજરાત આત્મીયતા ન્યૂઝ : કામરેજ
