રક્ષાબંધન વિશેષ: ભૌગોલિક સીમાઓના બંધનને તોડી ‘સાત સમુંદર પાર’…વસેલા ભાઈઓ સુધી બહેનોના પ્રેમનું રક્ષાસૂત્ર પહોંચાડતું ભારતીય ડાક વિભાગ
——
સુરતથી વિશ્વના ૧૦૦થી વધુ દેશોમાં કાળજીપૂર્વક સ્નેહાવરણ પહોંચાડતી ભારતીય ડાક સેવા: ૧૦,૬૦૦થી વધુ રાખી કવરનું રિયલ ટાઈમ ટ્રેકિંગ સાથે કુરિયર
——
બહેનોના સ્નેહની રાખડી સમયસર અને સુરક્ષિત પહોંચાડવા ભારતીય ટપાલ વિભાગની વિશેષ વોટર પ્રૂફ રાખી કવરની સુવિધા: સ્નેહલ પટેલ
——
રાજ્યભરમાંથી પોસ્ટ દ્વારા ૭૬ હજારથી વધુ રાખડી પરદેશમાં મોકલાઈ: USA, કેનેડા, ઓસ્ટ્રેલિયા, UKમાં રાખડી મોકલવાનું પ્રમાણ વધારે
——
રક્ષાબંધનનો પવિત્ર તહેવાર એટલે ભાઈ અને બહેનના અતુટ સ્નેહ, અવિચળ વિશ્વાસ અને રક્ષણની વચનબદ્ધતાનો દિવ્ય ઉત્સવ. નશીબદાર હોય છે એ ભાઈ જેમના કાંડા ઉપર બહેનની રાખડી બંધાય છે. આજના આધુનિક યુગમાં ઉચ્ચ શિક્ષણ કે રોજગાર અર્થે દેશના અન્ય રાજ્યો સહિત અમેરિકા, કેનેડા, ઓસ્ટ્રેલિયા જેવા સાત સમુદ્ર પાર વસતા પોતાના વહાલસોયા ભાઈના મણિબંધ પર રક્ષાસૂત્ર બાંધવું એ દરેક બહેનની સહજ ઝંખના હોય છે. જ્યારે ભૌતિક અંતર હજારો કિલોમીટરનું હોય ત્યારે પ્રેમ અને લાગણીઓની આ રાખડીને સમયસર પહોંચાડવાનું ભગીરથ કાર્ય ભારતીય ડાક વિભાગ અવિરતપણે કરી રહ્યું છે.
રક્ષાબંધનના પવિત્ર પર્વ નિમિત્તે સુરત ટપાલ વિભાગે આધુનિકતા અને સંવેદનશીલતાના સુંદર સમન્વય સાથે સુરતથી દુનિયાના ૧૦૦થી વધુ દેશોમાં રિયલ ટાઈમ ટ્રેકિંગ સુવિધા સાથે છેલ્લા ૨૫ દિવસમાં ૧૦,૬૦૦થી પણ વધુ વિશેષ રાખી કવર અને પાર્સલ રવાના કરવામાં આવ્યા છે. ગુજરાતમાંથી પોસ્ટ દ્વારા ૭૬ હજારથી વધુ રાખડીના પાર્સલ પોસ્ટ મારફતે પરદેશમાં મોકલાયા છે. યુએસએ, કેનેડા, ઓસ્ટ્રેલિયા, યુકેમાં રાખડી મોકલવાનું પ્રમાણ વધારે છે. ઈન્ટરનેશનલ ટ્રેક પેકેટ સર્વિસિસ (આઈટીપીએસ) અને સ્પીડ પોસ્ટ મારફતે દેશભરમાં જ નહીં પરંતુ સાત સમુંદર પાર વિદેશમાં બેઠેલાં સ્વજનો સુધી સ્નેહનું પ્રતિક એવી રાખડી મોકલવા માટે ભારતીય ડાક સેવા લોકોની પહેલી પસંદ બની છે.
એસ.વી.આર. કોલેજ પોસ્ટ ઓફિસના પોસ્ટલ આસિસ્ટન્ટ સ્નેહલ પટેલે જણાવ્યું હતું કે, આજના આધુનિક યુગમાં ભાઈઓ ભણતર અર્થે કે નોકરી-ધંધા માટે અન્ય સિટી સાથે વિદેશોમાં પણ વસતા હોય છે. આવા સમયે બહેનોને તેમની રાખડી ભાઈ સુધી પહોંચાડવા માટે ભારતીય ડાક પહેલી પસંદ બની છે. બહેનો અહીંયા આવીને એમની રાખડી પોસ્ટ કરે છે ત્યારે ઘણી ભાવુક જોવા મળે છે. બહાર વસતા ભાઈઓને બહેને ૩, ૪, ૫ કે ઘણા વર્ષથી જોયા પણ નથી હોતા. આવા સમયે બહેનો રાખડીની સાથે સાથે પોતાની લાગણી, પ્રેમ અને આશીર્વાદ પણ પોતાના ભાઈને મોકલતી હોય છે.
વધુમાં તેમણે જણાવ્યું હતું કે, આજના આધુનિક સમય સાથે તાલ મિલાવીને ભારતીય ડાક પણ નવીનતમ સેવાઓ સાથે સજ્જ બન્યું છે. બહેનોની રાખડી સુરક્ષિત રહે તે માટે વિશેષ ડિઝાઇનર રાખડીની થીમ સાથે વોટરપ્રૂફ કવર, ઘરેબેઠા વોટ્સએપથી પિકઅપ સુવિધા, સેલ્ફ બુકિંગ અને ઓનલાઇન સ્પીડ પોસ્ટ ટ્રેકિંગ જેવી સેવાઓથી ડાક વિભાગે આ પ્રક્રિયાને અત્યંત સરળ બનાવી છે. કાશ્મીરથી કન્યાકુમારી, કચ્છથી કોહિમા સુધી જ નહીં, પરંતુ વિશ્વના ૧૦૦થી વધુ દેશો સુધી ભારતીય ડાકની સેવાઓ થકી બહેનની રાખડીઓ પરદેશ પહોંચી છે. બહેનનો પ્રેમ અને આશીર્વાદ પોતાના ભાઈ સુધી રક્ષાબંધન સુધી સમયસર પહોંચે તે માટે રવિવાર કે તહેવારના દિવસે પણ ટપાલ વિભાગ કાર્યરત હોય છે. અમે માત્ર રાખડી કવર જ નહીં પણ, બહેનની મમતા, સ્નેહ અને શુભેચ્છાઓનું વિતરણ કરીએ છીએ એમ તેમણે જણાવ્યું હતું.
સુરત શહેરમાં છેલ્લા ૧૪ વર્ષથી સ્થાયી થયેલા શિવાંગીસિંહ માટે ભારતીય ડાક વિભાગ સરકારી સેવા સાથે ભાઈ પ્રત્યેના પ્રેમને સુરક્ષિત રીતે પહોંચાડતું પરમ શ્રદ્ધાનું કેન્દ્ર છે. તેઓ જણાવે છે કે, નોકરી-ધંધા અને સંસારની જવાબદારીઓ વચ્ચે દર વર્ષે રક્ષાબંધન પર રૂબરૂ જઈને ભાઈના કાંડે રાખડી બાંધવી શક્ય બનતી નથી. આવા સમયે ભારતીય ડાક વિભાગ તેમની વહારે આવે છે. છેલ્લા ૧૪ વર્ષથી તેઓ સતત ભારતીય ડાક મારફતે જ પોતાની રાખડી ભાઈ સુધી મોકલે છે. વધુમાં આ વર્ષના પોતાના અનુભવને વાગોળતા શિવાંગીસિંહ અત્યંત હર્ષ સાથે ઉમેરે છે કે, આ વખતે મેં ડાક દ્વારા રાખડી રવાના કરી અને માત્ર ત્રણ જ દિવસમાં મારા ભાઈને મળી ગઈ હતી. ભારતીય ડાક વિભાગ આટલી સંવેદનશીલતા, ઝડપ અને કાળજીપૂર્વક કામગીરી કરીને આપણી લાગણીઓ સમયસર પહોંચાડે છે તે ખરેખર બિરદાવવા યોગ્ય છે.
સરહદો અને મહાસાગરોના અંતરોને ઓગાળીને બહેનોના સ્નેહાવરણને ભાઈ સુધી સહીસલામત પહોંચાડતી ડાક વિભાગની આ સેવા ભારતીય સંસ્કૃતિ અને લાગણીઓના જીવંત સેતુ સમાન છે.
CMO Gujarat Surat Collectorate
#surat #infosurat #gujarat #gujaratinformation # ગુજરાત આત્મીયતા ન્યૂઝ :-9016924808
